ఇంతే నాకుచాలు

అందరాని చందమా నాకెందుకు
అద్దంలాంటి నామామ చాలునాకు
చక్కెరలేని పాలకోవా నాకెందుకు
చక్కనిమనసున్న బావే చాలునాకు
అందాల రాజకుమారుడు నాకెందుకు
అన్నీతెలిసిన అత్తకొడుకు చాలునాకు
సొమ్ముకావాలనే సోగ్గాడు నాకెందుకు
నన్ను మెచ్చిన సొగసరోడే చాలునాకు
చూడ చక్కని సుందరుడు నాకెందుకు
నాబుగ్గన దిష్టి చుక్కెట్టేవాడు చాలునాకు
బాసలెన్నో చేసే బడాబాబు నాకెందుకు
నానుదుటి బాసికమయ్యేవాడే చాలునాకు
అందరిలా అన్నీ అడిగేదాన్ని కానే కాను
కొందరిల కొన్ని కోరను... ఇంతే నాకుచాలు

ఇదేం ప్రేమో!

అందరికీ అందుబాటులో ఉంటావు
నాకుమాత్రం అందకుండా పోయావు

అందరిపై కారుణ్యాన్ని చూపుతావు
నా కళ్ళలో ప్రేమనుమాత్రం చూడవు

అందరి గుండెలయలకర్థం చెబుతావు
నా గుండెఘోషనెందుకో వినకున్నావు

అందరితో పరిచయాలు స్నేహమంటావు
నా పరిచయమొక్కటే నీకు వింతంటావు

అందరికీ అర్థమై నాకు అర్థంకాకున్నావు
ఇదేమిటంటే ప్రేమంటే ఇదేనని అంటావు!