మనసు మనసుతో

మనసు మనసుతో అన్నది బాసచేయమని
ఎక్కడున్నా ఎన్నటికీ నన్ను మరచిపోవద్దని
ఋతువులెన్ని మారినా నీవు మారిపోవద్దని

ప్రేమమార్గంలో జంటగా నిన్ను తోడు రమ్మని
ప్రశాంతంగా ఉండనీయని ప్రేమకోరింది ప్రేమని
జీవితమే నీదని తెలిసడిగింది జీవంపోయమని

దూరమెంతైనా వెళ్ళినంత వేగిరం తిరిగిరమ్మని
ఇదిగో అదిగో అని మాటలతో మభ్యపెట్ట వద్దని
పగలైనా మబ్బేసినా వెన్నెలరేయైనా రారమ్మని 

ప్రాణాన్నే ప్రాణానికి పెట్టుబడి పెట్టి ప్రేమించమని
ఓ జ్ఞాపకమా మనసావాచా మరచిమారిపోవద్దని

నాకిష్టం

ఎవరినీ కష్టపెట్టకూడదు అన్నదే నాకు ఇష్టం
నా వేదనా సామ్రాజ్యానికి మహారాణిని నేను
పరుల ఆనందం పంచన చేరే అనుభవంలేదు

అందరూ నవ్వుతూ ఉండాలన్నదే నా కోరిక
ఎదుటివారికి చెడును ఎన్నడూ నేను కోరను
ద్వేషాన్ని నాటి నీరుపోసి పెంచడం నాకురాదు

ఇతరుల కొరకు  ఎంతటి త్యాగానికైనా నే సిధ్ధం
వేరొకరికి కీడెంచి శాపాలతో జీవిస్తూ బ్రతకలేను
పొరపాటునైనా మనసు నొప్పించడం నాకురాదు