నా ఆలోచల్లో మసగబారిన చిత్రానివి
అయినా జీవితానికి ఒక చిగురాశవి!
నాకే తెలిసీ తెలియని చూడని నేస్తావి
అయినా మది నమ్మిన నమ్మకానివి!
నా ప్రార్ధనలో పడిలేచే నిట్టూర్పుసెగవి
దూరాలు తరగని కలవాలన్న కోరికవి!
కలిస్తే కంటజాలువారే ఆనందభాష్పానివి
నన్నే తలచి నాతోనే ఉన్న నా ఊపిరివి!
ఎదసడి చెడిపిన మంచి మనసున్నోడివి
చెడ్డవాడివైనా నా పెదవిపై చిరునవ్వువి!
నా ఎన్నో జన్మల నిరీక్షణా సత్ఫలితానివి
చెంతచేరిన ఊహకందని ఉన్నతమైన వ్యక్తివి!
చాలు చాలు...ఈ దాగుడు మూతల సరసాలు
కనుదోయి వెనుక దాచబోకోయి అనురాగాలు
అందీయి చాన్నాళ్ళుగా అణగారిన మురిపాలు
జత కట్టేద్దాం మన ఇద్దరి వలపు దొంతరలు...
ఆగు ఆగు... దోచేయమాకు నాలోని సొగసులు
మనసైన వానికే అందించెదను ఈ వయ్యారాలు
ఊరించి ఇచ్చుటలో ఉన్నవి ఎన్నో గిలిగింతలు
పెనవేసుకుని పాడుకుందాం ప్రేమసరాగాలు...
లేనే లేవు... మన ప్రేమకు ఎటువంటి అడ్డుగోడలు
రానే రావు మనమధ్య ఏ విధమైన పొరపొచ్చాలు
